Drejtori i Përgjithshëm i ShSKUK, Valbon Krasniqi ka thënë se nëse vazhdon rënja e të infektuarve, ndoshta dhe mund të kemi dasma këtë vit në Kosovë
“Në bazë të indikatorëve që ne i përcjellim bashkë me IKShPK-në dhe Ministrinë e Shëndetësisë, atëherë merren masat e caktuara, nëse janë këta indikatorë që i kemi tani, atëherë mund të shpresojmë për një relaksim të situatës, por prapë se prapë vendimi i mbetet Ministrisë së Shëndetësisë bazuar në rekomandimet e IKSHPK-së”, tha Krasniqi.
Krasniqi ka thënë se për momentin janë 254 pacientë duke u trajtuar në spitalet e Kosovës.
“Nga fillimi i muajit maj, ka rënje të rasteve të të infektuarve, numëri i të hospitalizuarëve në shtatë spitale të Kosovës, është 254, ndërsa 10 pacientë janë në gjendje me të rëndë, dhe po trajtohen në repartet intensive, tha Krasniqi.
Ndryshe, para gati shtatë muajsh, Oda e Hotelerisë dhe Turizmit kishte përgatitur një manual se si do të mbahen dasmat dhe ahengjet në kohë pandemie.
Ky manual do të përdoret edhe tash, nëse lejohet organizimi i këtyre ahengjeve nga Ministria e Shëndetësisë.
Një gjë të tillë e ka konfirmuar për Gazetën Express, Kryetari i Odës së Hotelierisë dhe Turizmit, Hysen Sogojeva, i cili ka thënë se manuali mbetet i njëjti.
Bazuar në këtë manual, tash e tutje në hyrje të sallave do të angazhohet një infermier me një orar 2 orë pune, cili do t’ua kontrollojë temperaturën mysafirëve. Mëditja e tij do të jetë 30 euro dhe për pagesën do të kujdesen pronarët e sallave.
Rregulla të reja do të ketë edhe për kamerierët dhe të tjerët që do të angazhohen në shërbim.
“Punëtorët ose kamerierët do të shërbejnë me dorëza dhe do ta kryejnë shërbimin në një tavolinë me diametër 2m në të cilën do të lejohen të ulen maksimum 8 persona, distance 2m e tavolinës nga tavolina tjetër”, thuhet në manual.
Obligative do të jetë edhe posedimi i një liste me emrat e të pranishmëve në aheng që në rast të ndonjë shenje apo dyshimi të virusit të kenë adresë për gjurmim dhe këto shënime të ruhen së paku dy javë si dhe lokali afarist të paraqesë se cili punëtor ka shërbyer në ato tavolina.
Ndërkohë, i gjithë stafi do t’i nënshtrohet kontrollit mjekësor si gjithmonë nga mjekët sanitar.
Me manualin e ri, pronarët e sallave duhet të dezinfektojnë objektin, sallën, kuzhinën dhe të vendosin shenja paralajmëruese për kujdes të shtuar si dhe dezinfektues me bazë alkooli nëpër salla.
“Menaxhmenti do të ketë rol kyç dhe të jenë në nivel detyre me qëllim të respektimit të masave nga ana e stafit në mënyre efektive t’i kontrolloj pikat dezinfektuese brenda dhe jashtë objektit të kujdeset që ato të jenë të mbushura me produkte si sapun dhe dezinfektues të kujdesen në pastërtinë e stafit si dhe pauza të shkurta kohë pas kohe personat përgjegjësi të kontrollojnë zbatimin e masave”, thuhet tutje në manual.
