Ndërmarrja publike Trainkos, edhe pse në krizë financiare, u detyrua t’iu japë stimuj 88 punëtorëve të saj që të dalin në punë gjatë kohës së pandemisë.E gjithë kjo u bë pa miratimin e bordit të drejtorëve të kësaj ndërmarrjeje, me ç’rast të gjithë punëtorët esencial që kishin ndërlidhje me funksionimin e transportit të mallrave kishin përfituar nga 7€ bruto për çdo ditë të paraqitjes në punë.
Në muajin Mars të vitit paraprak kishin përfituar stimuj 47 punonjës kurse në muajin Prill të 2020-s kishin përfituar edhe 88 punonjës tjerë, me një vlerë totale për dy muaj prej 9 mijë e 746 euro.
Sipas Auditorit të Përgjithshëm, këto stimulime nuk ishin miratuar nga ana e Bordit të drejtorëve siç e kërkon rregullorja mbi pagat dhe kompensimet tjera.
Sipas raportit të fundit për vitin 2020 nga Zyra Kombëtare e Auditimit, dhënia e këtyre stimujve nga Trainkos-i pa miratim nga Bordi i drejtorëve është në kundërshtim me rregulloren si dhe rrit rrezikun që ky proces të mos jetë i drejtë, e i cili edhe mund të shkaktojë diskriminim dhe pakënaqësi brenda ndërmarrjes, e cila si pasojë e kësaj mund të ketë ndikim në mos realizimin e objektivave.
E në bazë të kësaj, Auditori thotë se mund të krijohen edhe shpenzime të paparashikueshme që mund të rëndojnë gjendjen financiare të ndërmarrjes.
Rekomandimet e auditorit lidhur me këtë çeshtje ishin se bordi i drejtorëve është dashur të sigurojë stimuj të veçantë, të cilët jepen vetëm në bazë të procedurës zyrtare të miratuar nga Bordi, e cila do të duhej të siguronte transparencë dhe trajtim të barabartë për të gjithë punonjësit e ndërmarrjes.
Ndërkohë që ndërmarrja Trainkos gjatë vitit 2020 kishte pranuar subvencion nga pakoja emergjente me vendim të qeverisë për menaxhimin e situatës së krijuar nga pandemia Covid-19 në vlerë prej 600,000€.
Nga kjo shumë 500,000€ ishin dedikuar për të shlyer detyrimet ndaj furnitorëve respektivisht Infrakos sh.a, gjersa pjesa tjetër prej 100,000€ ishte akorduar për të mbuluar deficitin në shpenzime tjera, respektivisht ishin paguar për: detyrimet e papaguara të kontributeve në paga në vlerë të përbashkët prej 69,080€, për shpenzimet e furnizimit me naftë në vlerë prej 30,460€, si dhe shpenzime për shpenzime administrative prej 460€.
