Në Ditën Ndërkombëtare të Punëtorëve, kryeministri i Kosovës, Albin Kurti, shkroi se pas 11 vjetësh është hapur rruga për ngritjen e pagës minimale. Ai tha të dielën se nga rritja e pagës minimalë në 265 euro bruto, do të përfitojnë rreth 100 mijë punëtorë.
Kurti potencoi se paga prej 250 eurove nuk do të tatohet, e ndikimi nga lirimi i shkallës së parë tatimore kap vlerën prej 16 milionë euro, dhe i prekë afro 300 mijë punëtorë.
“Punësimin e mbështetëm edhe me Pakon e Ringjalljes Ekonomike. Mbi 1,000 punëtorë u rikthyen në punë pas humbjes së vendit të punës gjatë pandemisë. Mbi 4,000 punëtorë, burra e gra përfituan nga mbështetja e punëtorëve të formalizuar, e mbi 4,000 gra përfituan nga masa për mbështetjen për punësimin e grave”, shkroi Kurti në rrjetin social Facebook.
I pari i Qeverisë theksoi se krahas efekteve të pandemisë dhe luftës në Ukrainë, ka bërë çmos “që pjesët më të ndjeshme të shoqërisë tonë të preken sa më pak e ta përballojnë sa më lehtë këtë krizë të dyfishtë”.
“Bashkërisht, qeveria, arsimi, bizneset duhet t’i lidhin dijen dhe punën, që të rrisim vlerën dhe përvojën. Vlerën e mallit e shërbimeve dhe përvojën e punëtorit. Që të kemi edhe qytetarë më të mirë të Republikës, por edhe kontribues për shoqërinë, për këtë brez dhe brezat që do të vijnë pas nesh”, shkroi tutje.